Ekipi ligjor i Donald Trump ka pranuar mundësinë që ish-presidenti mund të paditet mes hetimeve për ruajtjen e sekreteve qeveritare në resortin e tij Mar-a-Lago në Florida.
Pavarësisht se ditë më parë pretenduan se Trump nuk mund të imagjinonte se mund të akuzohej, avokatët e tij bënë një pranim në një dosje gjyqësore këtë të hënë, duke propozuar se si të kryhej një shqyrtim i jashtëm i dokumenteve që u sekuestruan nga FBI në gusht.
Gjykatësi federal Raymond Dearie i kishte kërkuar më parë Trump të detajonte çdo material të ruajtur në Mar-a-Lago që ai mund të kishte vendosur t’i deklasifikonte.
Që nga e marta, avokatët e Trump kanë pretenduar se ai mund të deklasifikonte cilindo nga dokumentet, por nuk kanë thënë se ai në të vërtetë e ka bërë këtë.
Ish-presidenti deri më tani ka qenë i prirur të shqyrtojë publikisht mundësinë që ai mund të akuzohet pas kërkimit të FBI-së.
Në një intervistë të 15 shtatorit me prezantuesin e radios Hugo Hewitt, Trump tha: “Nuk mund ta imagjinoj të jem i paditur, nuk kam bërë asgjë të keqe” – qoftë në rastin e dokumenteve të klasifikuara, qoftë në hetimin e përpjekjeve të tij për të minuar rezultatet e zgjedhjet presidenciale të vitit 2020, të cilat ai i humbi nga Joe Biden.
Trump tha gjithashtu,“Unë nuk mendoj se njerëzit e Shteteve të Bashkuara do ta mbështesin atë” dhe se akuzat nuk do ta pengojnë atë të kandidojë përsëri për Shtëpinë e Bardhë në 2024, nëse ai dëshiron.
FBI tha se kërkimi në vendpushimin e Trump erdhi pasi agjentët zhvilluan prova bindëse se ish-presidenti po ruante atje materiale sekrete qeveritare. Sipas zyrtarëve, agjentët sekuestruan rreth 11,000 dokumente, si dhe 48 dosje bosh me shenja të klasifikuara./UBTNews/