Boksierja kosovare, Donjeta Sadiku vazhdon të jetë në pritje për lajme pozitive sa i përket vizës që do t’ia mundësonte asaj udhëtimin drejt Indisë, atje ku nga dita e nesërme do të zhvillohet Kampionati Botëror i boksit.
Kur kanë mbetur tashmë edhe pak orë deri në fillimin e turneut, KosovaPress mëson se Donjeta dhe ekipi i saj ende nuk kanë marrë përgjigje pozitive nga autoritete indiane për të udhëtuar drejt këtij shtetit i cili nuk e njeh Kosovën si shtet i pavarur.
Të shqetësuar me këtë situatë janë Federata e Boksit të Kosovës, trajnerja e Sadikut, Marjola Sallauka, por edhe Komiteti Olimpik i Kosovës dhe Ministria e Sportit.
Edhe pse tashmë kanë mbetur pak orë në dispozicion, Sekretari i Federatës së Boksit të Kosovës, Latif Demolli ka thënë shkurt se vazhdojnë të presin dhe se janë ende duke biseduar me Ministrinë e Punëve të Jashtme të Indisë.
“Jemi ende në bisedime, do të dëgjohemi prapë”, ka thënë shkurt Demolli.
Ndryshe, Donjeta Sadiku është përgatitur maksimalisht për këtë kampionat dhe synon medalje elitare nëse i jepet mundësia që të zbres në ring atje. Ajo vitin e kaluar fitoi medalje të bronztë evropiane dhe botërore.