Trajneri i Juventusit, Thiago Motta u shfaq shumë i kënaqur me skuadrën e tij të re pasi ata fituan 3-0 në shtëpi kundër Comos në ndeshjen e tyre hapëse të Serisë A të hënën.
Juve bëri një performancë të mirë pasi mundi Como-n e sapopromovuar me Samuel Mbangul, Timothy Ëeah dhe Andrea Cambiaso të cilët ishin mbresëlënës në ndeshjen e parë të sezonit në “Allianz Stadium”.
“Isha i kënaqur me paraqitjen, por mbi të gjitha me rezultatin. Ne e merituam të fitonim,” tha Motta në një konferencë për shtyp. “Sot më pëlqeu faza e mbrojtjes, duke kuptuar momentin për të bërë presion, rikompozuar, gatishmërinë e sulmuesve, të Dushanit (Vlahovic) për të nisur presingun e parë. Jam i kënaqur. Mund të përmirësohemi edhe atje dhe do të përpiqemi ta bëjmë atë në çdo gjë. Mendoj se ky ekip duhet dhe mund ta bëjë“, theksoi Motta.
Juve, i cili fitoi nëntë kampionate radhazi midis 2012 dhe 2020, shpreson për një fillim të ri nën drejtimin e trajnerit italo-brazilian, objektivi kryesor i të cilit do të jetë sigurimi i kurorës së parë në Serie A për klubin torinez në katër vjet.
“Përulësia është gjithmonë e nevojshme,” tha Motta. “Ashtu si ai i Dushanit sot që u rikthye për të konsoliduar skuadrën. Luajtëm mirë kundër një ekipi shumë të mirë që po vinte me shumë entuziazëm”, tha në fund ai.