Çmimet e naftës u rritën me 3% të mërkurën, teksa lufta e SHBA-së dhe Izraelit kundër Iranit ndërpreu furnizimet nga Lindja e Mesme. Megjithatë, ritmi i rritjes u ngadalësua krahasuar me seancat e kaluara, pasi Presidenti Donald Trump sugjeroi se Marina e SHBA-së mund të shoqërojë anijet tregtare përmes Ngushticës së Hormuzit.
Nafta bruto e llojit Brent u rrit me 2.67 dollarë, ose 3.3%, duke arritur në 84.07 dollarë për fuçi rreth orës 06:59 GMT, pasi mbylli ditën e martë në nivelin më të lartë që nga janari i vitit 2025. Ndërkohë, nafta amerikane West Texas Intermediate (WTI) u rrit me 2.24 dollarë, ose 3%, duke arritur në 76.8 dollarë, pasi u stabilizua në vlerën më të lartë që nga qershori. Të dy treguesit referencë janë rritur me rreth 5% ose më shumë gjatë dy seancave të fundit. Analisti i lartë i tregut në OANDA, Kelvin Wong, u shpreh se faktori kryesor afatshkurtër për çmimet e naftës mbetet konflikti midis SHBA-së dhe Iranit.
Sipas tij, në këtë fazë, vetëm shenjat e qarta të de-përshkallëzimit mund të zbusenin ose të përmbysnin trendin aktual rritës për naftën WTI, por sinjale të tilla aktualisht mungojnë. Forcat izraelite dhe amerikane goditën objektiva në të gjithë Iranin të martën, gjë që nxiti sulmet iraniane kundër infrastrukturës energjetike në një rajon që mbulon pothuajse një të tretën e prodhimit botëror të naftës.
Iraku, prodhuesi i dytë më i madh i naftës bruto në Organizatën e Vendeve Eksportuese të Naftës (OPEC), ka reduktuar prodhimin me gati 1.5 milion fuçi në ditë — rreth gjysma e prodhimit të tij — për shkak të kufizimeve në magaziniere dhe mungesës së një rruge eksporti, bënë të ditur zyrtarët për Reuters. Ata shtuan se vendi mund të detyrohet të ndërpresë prodhimin e tij prej afro 3 milionë fuçish në ditë brenda pak ditësh, nëse nuk rifillojnë eksportet.
Irani ka shënjestruar gjithashtu anijet cisternë në Ngushticën e Hormuzit, përmes së cilës kalon rreth një e pesta e naftës botërore dhe gazit natyror të lëngshëm. Trafiku përmes kësaj Ngushtice mbetet efektivisht i bllokuar. Presidenti Trump deklaroi se Marina amerikane mund të fillojë shoqërimin e cisternave të naftës nëse është e nevojshme, duke shtuar se ka urdhëruar Korporatën Ndërkombëtare të Financimit të Zhvillimit të SHBA-së që të ofrojë sigurim ndaj rreziqeve politike dhe garanci financiare për tregtinë detare në Gjirin Persik.
Analistët e ING-së vlerësuan se ky është një lajm i mirë, por theksuan se nuk do të ndodhë brenda natës, pasi shoqërimi ushtarak do të ishte i dobishëm, por kërkon kohë për t’u zbatuar. Disa analistë të tjerë ishin të pasigurt nëse ky hap do ta kufizonte për shumë kohë rritjen e çmimeve. Wong nga OANDA shtoi se masat e Trumpit për të mbajtur hapur Ngushticën e Hormuzit nuk duket se kanë shkaktuar ndonjë ndryshim në trendin aktual rritës të çmimeve.
Ai vuri në dukje se nafta WTI ka arritur të ruajë pozicionin e saj në nivelin kyç të mbështetjes afatshkurtër prej 70.70 deri në 73.40 dollarë për fuçi. Ndërkohë, shtete dhe kompani të ndryshme kanë filluar të kërkojnë rrugë dhe furnizime alternative. India dhe Indonezia deklaruan se po kërkojnë burime të tjera energjie, ndërsa disa rafineri kineze po mbyllen ose po përshpejtojnë planet e tyre për mirëmbajtje.
Në Shtetet e Bashkuara, rezervat e naftës bruto u rritën me 5.6 milionë fuçi javën e kaluar, sipas burimeve të tregut që cituan shifrat e Institutit Amerikan të Naftës (API), shifër kjo shumë më e lartë se 2.3 milionët e parashikuar nga analistët. Shifrat zyrtare nga qeveria amerikane pritet të publikohen më vonë gjatë ditës së mërkurë./Reuters/