Duke filluar nga 14 tetorit, të gjithë udhëtarët që kanë qenë në Ruandë brenda 21 ditëve të fundit do t’i nënshtrohen kontrollit të veçantë shëndetësor në aeroportet e SHBA-së. Këto masa janë ndërmarrë nga Departamenti i Shëndetësisë dhe Shërbimeve Njerëzore të SHBA-së (HHS) dhe Qendrat për Kontrollin dhe Parandalimin e Sëmundjeve (CDC), edhe pse nuk ka asnjë rast të konfirmuar të virusit jashtë Ruandës, dhe rreziku për SHBA-në është i ulët.
Asnjë rast i Marburgut nuk është raportuar jashtë Ruandës si pjesë e këtij shpërthimi dhe zyrtarët thonë se rreziku aktual për SHBA-në është i ulët.
Virusi Marburg, një sëmundje hemorragjike e ngjashme me Ebolën, është shumë i rrezikshëm, me një normë vdekshmërie që mund të arrijë deri në 90%, përcjellë UBTNews.
Ai përhapet përmes kontaktit me lëngjet trupore të një personi të infektuar, dhe nuk është i transmetuar nga ajri, duke e bërë më të menaxhueshëm krahasuar me viruset si Covid-19.
Simptomat përfshijnë ethe, dhimbje muskujsh, gjakderdhje të brendshme dhe humbje të madhe të gjakut, shpesh me pasoja fatale. Aktualisht nuk ka vaksina apo trajtime specifike të aprovuara për këtë virus, dhe trajtimi bazohet në kujdes mbështetës si lëngje dhe pushim.
Përpjekjet ndërkombëtare për të ndihmuar në përballimin e kësaj situate janë në zhvillim. Ekipet e ekspertëve nga CDC dhe Organizata Botërore e Shëndetësisë (OBSH) janë vendosur në Ruandë për të ndihmuar punonjësit e shëndetësisë në terren.
SHBA ka angazhuar 11 milionë dollarë për mbështetje urgjente, duke përfshirë monitorimin e kontakteve dhe parandalimin e infeksionit. Gjithashtu, qindra doza vaksinash hetimore dhe disa doza terapeutike janë dërguar në Ruandë, duke ofruar një dritë shprese për kontrollin e mëtejshëm të shpërthimit.
Ndërsa kontrollet shëndetësore fillojnë, udhëtarët këshillohen të rishqyrtojnë udhëtimet jo të domosdoshme në Ruandë dhe të shmangin vizitat në objektet e kujdesit shëndetësor në zonat e prekura, përveç në rastet e emergjencave mjekësore.