Legjenda e Brazilit, Cafu e ka përkrahur yllin e Liverpoolit, Trent Alexander-Arnold, duke thënë se nuk e kupton pse ai nuk është titullar për Kombëtaren e Anglisë.
Alexander-Arnold ka arritur të bëjë vetëm 17 paraqitje për Anglinë që prej debutimit të tij në vitin 2018.
Por, gjatë viteve të fundit, ylli i Liverpoolit e ka pasur të vështirë që të jetë pjesë e planeve të Gareth Southgate te “Tre Luanët”.
Southgate në të shumtën e rasteve e preferon Kieran Trippier dhe Reece James në krahun e djathtë të mbrojtjes.
Alexander-Arnold bëri mbrëmë paraqitjen e parë në Kupën e Botës, ku u inkuadrua në lojë si zëvendësues i Kyle Walker.
Ikona e Brazilit, Cafu është një admirues i madh i Alexander-Arnold, dhe mendon se ylli i Liverpoolit posedon gjithçka në aspektin e kualitetit.
“Nuk e kuptoj pse Anglia nuk fillon ndeshjet me të. Ai ka çdo gjë, kualitet, driblim, shpejtësi, por gjithmonë është e njëjta histori, thonë se nuk je aq i mirë në mbrojtje dhe mbetesh jashtë. Dikush thoshte gjërat e njëjta edhe për Roberto Carlos dhe mua, por unë mendoj se ne fituam diçka”, tha Cafu.