Pavarësisht kundërshtimeve nga disa ligjvënës, autoritetet në Britani të Madhe kanë vendosur të mos kërkojnë pasaportën e vaksinimit kundër koronavirusit për hyrje në klube të natës dhe evente të tjera me shumë njerëz, duke përmbysur kështu politikën e mëparshme.
Sekretari britanik për Shëndetësi, Sajid Javid ka thënë se Qeveria e ka lënë në sirtar për disa kohë kërkesën për pasaportë, të cilën do ta rikonsiderojë megjithatë nëse rritet shumë numri i të infektuarve. Dëshmitë për vaksinim janë duke u kërkuar në disa vende europiane, përfshirë Francën dhe Italinë.
“Ne kemi bërë analiza dhe ndonëse duhet të ekzistojë si mundësi potenciale, e them me gëzim se nuk do të çojmë përpara planet për pasaportë të vaksinës”, pohoi Javid për BBC.
Ndërsa në SHBA, këshilltari kryesor i Shtëpisë së Bardhë për Çështjet e Shëndetit Publik, Vivek Murthy i mbrojti direktivat e reja të Presidentit Joe Biden që u kërkojnë miliona punonjësve të vaksinohen kundër koronavirusit, nën kërcënimin e mundshëm të humbjes së punës, edhe pse ka kundërshtime të gjera nga guvernatorët republikanë të shteteve amerikane.