Ish-kryeministri Boris Johnson u ka bërë thirrje liderëve perëndimorë që të dërgojnë avionë luftarakë në Ukrainë.
Johnson është aktualisht në Shtetet e Bashkuara për të nxitur mbështetje për Ukrainën përballë pushtimit rus.
Ai foli pasi Britania e Madhe dhe SHBA përjashtuan mundësinë e dërgimit të avionëve si Typhoon, F-35 ose F-16 në konflikt.
Presidenti i SHBA-së, Joe Biden ka përjashtuar në mënyrë eksplicite mundësinë e dërgimit të F-16 për forcat e Ukrainës, përcjell UBT News.
Duke folur për Fox News, Johnson tha, “sa herë që kemi thënë se do të jetë gabim të japim një armë të tillë, ne përfundojmë duke e bërë atë dhe përfundon të jetë gjëja e duhur për Ukrainën”.
Ai tha se ky ishte rasti me raketat antitank, raketat Himars dhe MLRS dhe së fundi tanket.
“Gjithçka që po them është që — kurseni kohë, kurseni para, shpëtoni jetë. Jepuni ukrainasve atë që u nevojitet sa më shpejt të jetë e mundur”, tha Johnson.
I pyetur për mundësinë që Vladimir Putin ta kthejë konfliktin bërthamor, Johnson tha se presidenti rus “nuk do ta bëjë këtë” pasi Perëndimi do ta fuste ekonominë e tij në “paralizë kriogjenike” nga e cila do të duheshin dekada për t’u rikuperuar./UBTNews/