Komisioni për Mbikëqyrjen e Financave Publike ka shqyrtuar Raportin e Auditimit për Pasqyrat Vjetore Financiare të vitit 2019 për Postën e Kosovës.
Leonard Shabanaj, kryesues i Bordit të Postës së Kosovës, është ankuar para deputetëve për kushtet e punës. Madje sipas tij, humbjet e kompanisë janë evidente duke mbërritur në miliona euro.
“Që në takimet e para me menaxhmentin jam përballur me pakënaqësi në të gjithë sektorët. Teknologjia është e vjetër. Sportelet nuk përkojnë me kërkesat e klientëve. Diskriminimi i stafit ka arritur në pikën më të lartë që po ndikon më demotivim. Humbje milionëshe vjetore nga viti në vit janë evidente. E kemi marrë me shqetësim punën tonë. Menaxhmenti na ka njoftuar se nga 25 rekomandimet e Auditorit, vetëm 11 janë zbatuar. Jemi një bord që kemi filluar punën afër 1 muaj e gjysmë”, deklaroi ai.
Deputetja e VV-së, Arta Bajralija tha se sa punonjës ka në ndërmarrje dhe sa përgatitje profesionale kanë ata, raporton EO.
“Keqmenaxhim me asete në këtë ndërmarrje. Auditori ka dhënë opinion të kundërt ku pasqyrat financiarë nuk paraqesin pasqyrë të drejtë. Transaksionet nuk janë bërë në mënyrë të rregullt. Keqpërdorimet janë edhe materiale. Shpërfaqin në mënyrë direkte dështimet e ndërmarrjes. Mbivlerësim të të ardhurave. Kjo ndërmarrje u bë barrë për buxhetin e shtetit”, deklaroi ajo.