Bordi i një shkolle në Tenesi ndaloi që të mësohet në shkolla romani fitues i çmimit Pulitzer rreth Holokaustit. Anëtarët e bordit votuan pro ndalimit të këtij romani sepse përmbante fjalë të ndyta dhe ilustrime lakuriq.
Romani grafik, “Maus: A Survivor’s Tale” përshkruan se si prindërit e autorit mbijetuan në kampin e përqendrimit Aushvic gjatë Holokaustit. Autori Art Spiegelman thotë se “u befasua” nga ky vendim.
Gjashtë milionë hebrenj vdiqën gjatë periudhës së Holokaustit – fushatë e Gjermanisë naziste për të zhdukur popullsinë hebreje të Evropës. Prindërit e tij ishin hebrenj polakë që u dërguan në kampet naziste të përqendrimit gjatë Luftës së Dytë Botërore.
Romani i tij Maus, i cili përmban ilustrime të vizatuara me dorë të minjve si hebrenj dhe maceve si nazistë, fitoi një sërë çmimesh letrare në vitin 1992.
Në një mbledhje të bordit të Shkollave të Qarkut McMinn në janar, anëtarët thanë se mendonin se përfshirja e fjalëve të ndyta në romanin grafik ishte e papërshtatshme për kurrikulën e klasës së tetë.
Në procesverbalin e takimit, drejtori i shkollave, Lee Parkinson, u citua të ketë thënë “libri ka gjuhë të pakëndshme”./UBTNews