Presidenti i Shteteve të Bashkuara, Joe Biden, ka hedhur poshtë sugjerimet se humbja tronditëse e partisë së tij në garën për guvernatorin e Virxhinias ishte një vendim për presidencën e tij, përcjell UBT News.
Ai përmendi “votuesit e Trump”, shkollat, punët dhe çmimet e benzinës si arsye të tjera për humbjen e papritur të Terry McAuliffe.
Republikani Glenn Youngkin, një i sapoardhur politik, fitoi garën për guvernator të Virxhinias të martën.
Në Shtëpinë e Bardhë, Biden u pyet nëse pranonte ndonjë faj për “tërmetin” politik të së martës në Virxhinia. Ai tha se votuesit janë “të mërzitur dhe të pasigurt për shumë gjëra”, duke përfshirë pandeminë, arsimin, ekonominë dhe çmimin e benzinës.
Biden pranoi se demokratët duhet të kishin miratuar pakon prej 1.75 trilion dollarësh të programeve sociale dhe klimatike dhe një prej 1 trilion dollarësh për infrastrukturën përpara së martës./UBTNews/