Presidenti amerikan Joe Biden do të hedhë votën e tij të parakohshme në zgjedhjet presidenciale këtë të hënë, sipas Shtëpisë së Bardhë.
Presidenti në largim pritet të votojë në Wilmington, Delaware, ndërsa gara presidenciale e 5 nëntorit premton të jetë tepër e ngushtë. Kandidati republikan dhe ish-presidenti Donald Trump përballet me kandidaten demokrate dhe zëvendëspresidenten Kamala Harris, në një garë që sipas sondazheve është jashtëzakonisht e barabartë.
Një sondazh i publikuar nga CNN javën e kaluar tregoi se të dy kandidatët janë me nga 47%, duke reflektuar ndarjen e thellë të elektoratit amerikan, përcjellë UBTNews.
Përveç zgjedhjes së presidentit, në këto zgjedhje do të përcaktohet edhe kontrolli i 34 vendeve në Senat, një çështje që mund të ndikojë ndjeshëm në balancën e pushtetit në Uashington. Kontrolli i Senatit është jetik për zbatimin e axhendës së ardhshme legjislative, duke e bërë këtë raund zgjedhjesh tejet vendimtar për të dyja palët./UBTnews/