Platformat e mediave sociale mund të detyrohen të bëjnë më shumë për të trajtuar abuzimin seksual të fëmijëve në internet, kjo sipas planeve të reja të BE-së që pritet të shpallen në muajt e ardhshëm.
Rregullat do të zëvendësonin legjislacionin aktual të përkohshëm që lejon raportimin vullnetar.
“Unë do të propozoj legjislacionin në muajt e ardhshëm që do t’u kërkojë kompanive të zbulojnë, raportojnë dhe heqin abuzimin seksual të fëmijëve”, tha komisionerja e çështjeve të brendshme të BE, Ylva Johansson për gazetën gjermane Welt am Sonntag.
“Një raport vullnetar atëherë nuk do të jetë më i mjaftueshëm”, tha ajo.
Meta, kompania mëmë e Facebook, Instagram dhe WhatsApp, do të ndikohej veçanërisht nga çdo ndryshim në rregullore, shtoi Johansson. Kompania aktualisht përbën rreth 95 për qind të njoftimeve të abuzimit seksual të fëmijëve.
Rregullat aktuale të BE-së për raportimin e materialit për abuzim seksual të fëmijëve ua lënë në dorë platformave të mediave sociale dhe shërbimeve të mesazheve të vendosin nëse do të ndjekin apo jo raste të dyshuara të përdoruesve që kryejnë vepra të abuzimit seksual të fëmijëve.
Problemi i imazheve të abuzimit seksual të fëmijëve është në rritje. Në qershor 2020, agjencia e zbatimit të ligjit të BE-së Europol publikoi një raport ku thuhej se pandemia e COVID-19 kishte çuar në një “rritje” në shpërndarjen e materialit të abuzimit seksual të fëmijëve në internet. Disa shtete anëtare të BE-së kishin deri në 25 për qind rritje të rasteve të raportuara.
Në komentet e saj për gazetën, Johansson tha se lufta kundër abuzimit të fëmijëve duhet të koordinohet më mirë dhe bëri thirrje për krijimin e një qendre të specializuar evropiane për të përmirësuar parandalimin, zbatimin e ligjit dhe mbështetjen e viktimave./UBTNews/