Bashkimi Evropian kërkoi një hetim pas rritjes së fundit të dhunës në Gaza, sepse civilë të pafajshëm, përfshirë një fëmijë, u vranë, tha një zyrtar i BE-së të martën.
“Ka nevojë (për hetim) sepse civilët janë lënduar ose vrarë, përfshirë një fëmijë“, u tha gazetarëve Peter Stano, zëdhënësi kryesor i shërbimit diplomatik të BE-së në konferencën e përditshme të Komisionit Evropian.
Ai theksoi se dhjetëra u plagosën dhe mbi 20 njerëz u vranë në shpërthimin e fundit të dhunës në dhe rreth Gazës.
“Sipas qëndrimit të BE-së, duhet të hetohet se çfarë ka ndodhur dhe pse këta njerëz, të cilët nuk kanë asnjë lidhje me asgjë, janë sjellë në rrezik. Hetimi është gjithashtu i rëndësishëm për të shmangur viktimat në të ardhmen që shtojnë vuajtjet e panevojshme dhe të pajustifikuara të popullatës civile“, shpjegoi ai.
Ai gjithashtu kujtoi se presidenti i ShBA Joe Biden bëri thirrje gjithashtu për një hetim në kohë dhe të plotë në raportet për viktimat civile.
Avionët luftarakë izraelitë nisën sulmet ajrore javën e kaluar, duke përmendur një kërcënim të menjëhershëm sulmi nga grupi palestinez Xhihadi Islamik pas tensioneve në rritje në territoret palestineze.
Sipas Ministrisë palestineze të Shëndetësisë, të paktën 44 palestinezë, përfshirë një vajzë 5-vjeçare, u vranë, ndërsa mbi 360 të tjerë u plagosën në sulmet ajrore.
Një armëpushim, i ndërmjetësuar nga Egjipti, midis Izraelit dhe Xhihadit Islamik hyri në fuqi të dielën.