Barcelona konfirmon pretendimet për titullin kampion në La Liga me një fitore bindëse 4-1 në fushën e Sevillas, duke iu afruar me vetëm dy pikë Real Madridit, kryesuesit të kampionatit. Ndeshja nisi me një ritëm të lartë, ku që në minutën e shtatë Robert Lewandowski shënoi golin e parë për “blaugranat” pas një aksioni të shpejtë.
Megjithatë, Sevilla reagoi menjëherë, dhe vetëm pak sekonda pas rifillimit të lojës, Vargas barazoi rezultatin në 1-1 pas një asisti nga Saul Niguez.
Pjesa e dytë nisi me një tjetër moment të shkëlqyer për Barcelonën, kur Fermin Lopez, i sapofutur në lojë, riktheu epërsinë për katalanasit duke shënuar në minutën e 46-të. Dominimi i ekipit të Xavit u konfirmua edhe më tej, me Raphinha-n që realizoi golin e tretë në minutën e 55-të. Pavarësisht ndëshkimit me karton të kuq të Fermin Lopez, Barcelona nuk e uli ritmin dhe vulosi fitoren me golin e katërt të realizuar nga Garcia në fund të ndeshjes.
Me këtë fitore, Barcelona e ndez akoma më shumë garën për titullin dhe tregon se është e gatshme të sfidojë deri në fund rivalët e përjetshëm të Real Madridit./UBTNews/
