Banka Qendrore e Norvegjisë ngriti normën bazë të interesit të politikës së saj nga 0.75% në 1.25% të enjten, duke thënë se perspektivat për një periudhë më të zgjatur të inflacionit të lartë sugjerojnë një rritje më të shpejtë të normës së politikës sesa ishte parashikuar më parë.
Në një deklaratë, Norges Bank përmendi një rënie më të madhe se sa pritej të papunësisë dhe një inflacion më të lartë se sa pritej si faktorë në vendimin e saj. Inflacioni në Norvegji është 5.7%, ndërsa papunësia ka arritur në 3.2% në maj.
“Me rritjen e pagave dhe inflacionin e mallrave të importuara, ka perspektiva që inflacioni të qëndrojë mbi objektivin për disa kohë”, tha banka.
Guvernatorja e bankës, Ida Wolden Bache, tha se norma e interesit me shumë gjasa do të rritet më tej, në 1.5% në gusht.
“Një rritje më e shpejtë e normës tani do të zvogëlojë rrezikun e rritjes së inflacionit dhe nevojën për një shtrëngim më të mprehtë të politikës monetare”, tha Bache.
Banka tha se parashikimi i saj tregon një rritje të normës së politikës në rreth 3% në periudhën deri në verën 2023.
Norvegjia nuk është anëtare e BE-së. /UBTNews/