UBT News

Aya, foshnja që lindi nën rrënojat e tërmetit në Siri, zhvendoset në një lokacion të sigurt

Një foshnjë siriane jetime, e lindur nën rrënojat e shtëpisë së saj të shembur pas tërmetit të javës së kaluar, është zhvendosur në një “lokacion të sigurt” nga një autoritet shëndetësor.

Drejtoria e Shëndetësisë mori këtë vendim për të mbrojtur vajzën, Aya, nga rrëmbimi i mundshëm dhe mashtrimi i birësimit, tha një burim për BBC.

Të hënën u raportua për një incident të dhunshëm në spitalin ku po trajtohej ajo.

Kreu i drejtorisë së shëndetësisë, mjeku Ahmad Hajj Hassan, mohoi të ketë pasur përpjekje për ta rrëmbyer atë.

“Akuzat për rrëmbim ishin keqkuptim. Kjo është një çështje tërësisht e brendshme që lidhet me spitalin dhe nuk ka asnjë lidhje me foshnjën”, tha ai për BBC.

Mijëra njerëz ofruan adoptimin e foshnjës javën e kaluar, pasi historia e saj u raportua gjerësisht nga mediat vendase dhe ndërkombëtare.

Gjithsesi, drejtoria e shëndetësisë është e vendosur që të ketë prioritet mirëqenien e saj dhe të veprojë me kujdes me procesin e birësimit, sipas burimit.

Nëna e Aya-s shkoi në lindje menjëherë pasi shtëpia e tyre familjare në qytetin e Jidayris u shkatërrua nga tërmeti 7.8 ballë që goditi Turqinë jugore më 6 shkurt. Ajo vdiq pasi lindi Aya, e cila ishte ende e lidhur me kordonin e kërthizës kur u gjet nga ekipet e shpëtimit.

Babai i Aya-s, katër vëllezërit e motrat dhe një hallë vdiqën gjithashtu në katastrofë.

Exit mobile version