Në pritje të gjyqit mes UEFA-s dhe tre klubeve që nuk kanë hequr dorë ende nga Superliga Europiane për klube, 6 prej skuadrave nismëtare kanë marrë edhe ndëshkimin e parë për këtë iniciativë.
Bëhet fjalë për 6 klubet angleze si Manchester City, Manchester United, Chelsea, Arsenal, Tottenham dhe Liverpool, që ishin pjesë e 12 klubeve themeluese të kompeticionit dhe janë gjobitur nga Premier League.
Bëhet fjalë për një gjobë të majme prej 20 milionë paundësh, që do të ndahet në pjesë të barabartë nga të 6 klubet, teksa ka pasur edhe një paralajmërim për masa edhe më të rënda, nëse do të tentohet pjesëmarrja në kompeticione të ngjashme.
Kështu në rast përsëritjeje të së njëjtës iniciativë klubet rrezikojnë një gjobë prej 20 milionë paundësh secila dhe në të njëjtën kohë një penalizim prej 30 pikësh në renditje në kampionatin pasardhës.
Klubet angleze ishin të parat që hoqën dorë nga Superliga Europiane, më pak se 72 orë nga krijimi i saj, pasi nuk e përballuan presionin e tifozëve, që zbritën të protestojnë në rrugë kundër një nisme të tillë.
Më pas u tërhoqën edhe Interi, Milani e Atletico Madrid, teksa aktualisht nuk kanë hequr dorë akoma Barcelona, Reali i Madridit dhe Juventusi, të cilat po përballen me UEFA-n edhe në një betejë ligjore, që ka përfunduar deri në Gjykatën Europiane.