Ambasadorja e re amerikane në Rusi, Lynne Tracy, u takua të hënën për herë të parë me një diplomat të lartë rus në Ministrinë e Punëve të Jashtme në Moskë.
Ajo u prit nga një grup i vogël njerëzish që qëndronin pranë hyrjes së ministrisë, duke bërtitur, “lufta është një biznes për SHBA-të”, sipas një video të postuar nga media shtetërore ruse TASS dhe RIA Novosti.
Tracy u konfirmua nga Senati i SHBA-së më 21 dhjetor dhe u betua më 9 janar. Ajo u takua me Sergei Ryabkov, zëvendësministrin e Punëve të Jashtme të Rusisë.
“Ambasadorja Tracy e fillon mandatin e saj në Moskë duke u fokusuar në ruajtjen e dialogut midis kryeqyteteve tona në një kohë tensioni të paprecedentë”, thuhet në një deklaratë të Ambasadës së SHBA-së në Moskë. “Ajo do të jetë një avokate për sigurinë dhe trajtimin e drejtë të të gjithë qytetarëve amerikanë të ndaluar në Rusi. Ambasadorja Tracy gjithashtu pret të mbështesë lidhjet e gjata midis popullit amerikan dhe rus”.
Takimi vjen mes tensioneve midis të dy vendeve për luftën e Moskës në Ukrainë dhe njoftimit të fundit të Shteteve të Bashkuara për të dërguar tanke në Kiev së bashku me aleatët e tjerë.
Në një intervistë të lëshuar të hënën, Ryabkov i tha agjencisë shtetërore të lajmeve RIA Novosti se vendimi i SHBA-së dhe aleatëve të NATO-s për të dërguar tanke në Ukrainë e ka bërë “të pakuptimtë” që Moska të angazhohet në çdo lloj bisedimi me Kievin./UBTNews/