Aktorja e ndjerë e Hollywood-it, Natalie Wood u abuzua seksualisht si adoleshente nga aktori i ndjerë, Kirk Douglas, pohon një libër i ri.
Motra e aktores Natalie, Lana, i bëri këto akuza në librin e saj përkujtues me titull “Little Sister”, libër ky që do të publikohet më 9 nëntor.
Sipas fragmenteve të këtij libri, që u publikuan nga Associated Press, Douglas e sulmoi seksualisht atë verën e vitit 1955. Sulmi dyshohet se ka ndodhur teksa Wood po xhironte filmin “The Searchers”.
Lana Wood thotë se takimi i yjeve të Hollivudit në hotelin e famshëm “Chateau Marmont” ishte organizuar nga nëna e saj, Maria Zakharenko, e cila shpresonte që i ndjeri Douglas do ta ndihmonte atë që t’i hapeshin dyert në aktrim.
Douglas, atëkohë 30-vjeçar, ishte një nga aktorët më të njohur të Hollywoodit, dhe u shfaq në filmat sikurse “Spartacus”, “The Bad and the Beautiful” dhe “Gunfight at the O.K. Corral”.
Lana Wood, e cila ishte vetëm 8-vjeçe në atë kohë, thotë se motra dhe e ëma vlerësuan se nëse do ta akuzonte publikisht Douglasin, kjo do t’ia shkatërronte asaj karrierën. Ajo thotë se motra e saj i tregoi çfarë i ka ndodhur vetëm pas një kohe.
Douglas vdiq në shkurt të vitit 2020, në moshën 103-vjeçare. Thashethemet për sulmin e supozuar kishin qenë aq të përhapura, saqë pas vdekjes së tij, emri i zonjës Wood u bë trend krahas emrit të tij në Twitter.
Wood vdiq në rrethana misterioze në nëntor të vitit 1981 gjatë një udhëtimi me barkë në ishullin Santa Catalina në Kaliforni./UBTNews