Agjenti i Alessandro Bastonit, Tullio Tinti është takuar me drejtuesit e Interit sot për të nisur bisedimet për kontratë të re mes interesimit nga Chelsea dhe Manchester City.
Marrëveshja aktuale e qendërmbrojtësit italian 23-vjeçar me “Nerazzurrët” skadon në vitin 2024 dhe klubi nuk dëshiron një përsëritje të situatës së Milan Skriniar, kështu që ata janë të hapur për oferta për mbrojtësin nëse ai nuk nënshkruan një kontratë të re në muajt e ardhshëm.
Chelsea dhe Manchester City raportohet se janë të interesuar të marrin Bastonin në verë dhe po e ndjekin nga afër situatën e tij.
“Calciomercato.com” nxjerr në pah se si Tinti u takua me drejtuesit e Interit në selinë e tyre sot për të nisur negociatat për kontratën e re.
Duke folur për shtypin pas takimit, Tinti dha një përditësim mbi situatën dhe konfirmoi synimet e Bastonit.
“Këto janë takimet e para, ne po flasim. Hapësirë do të ketë edhe në javët në vijim. Bastoni është një tifoz i Interit, nuk e di pse tifozët do të shqetësoheshin. Nga ana e lojtarit ka interes të madh për të qëndruar këtu”, tha ai.
Interi shpreson ta lidhë atë me një kontratë të re, por do të preferonte ta shesë në vend që ta humbasë si një transferim të lirë. Ata po ndjekin nga afër Giorgio Scalvini e Atalantës si një zëvendësues të mundshëm.