Kryeministri i Kosovës, Avdullah Hoti bashkë me Ministren e Kulturës, Rinisë dhe Sportit, Vlora Dumoshi, mori sot pjesë në ceremoninë e ndarjes së marrëveshjeve për mbështetje financiare të 38-të Federatave Sportive të Kosovës. Vlera e mjeteve financiare nga fondi për mbështetjen e sportit në kohë të pandemisë është 1.5 milion euro, ku do të përfitojnë 627 klube, me rreth 26 mijë sportistë.
Hoti përgëzoi kryetarët e federatave, Presidentin e Komitetit Olimpik të Kosovës, përfaqësuesit e federatave dhe sporteve të ndryshme për punën që po e bëjnë, në respektimin e masave kundër pandemisë.
“Më vjen mirë që kemi arritur të ndajmë një pjesë të mbështetjes që ju të përballeni me këtë situatë të vështirë nëpër të cilën po kalojnë të gjithë qytetarët e vendit pa përjashtim”, deklaroi shefi i Qeverisë.
Kryeministri Hoti deklaroi se edhe për vitin e ardhshëm është paraparë një pako e mbështetjes që përfshinë edhe fushën e kulturës, rinisë dhe sportit./UBTNews