Të mërkurën, me fillim nga ora 18:00 në stadiumin “Fadil Vokrri” në Prishtinë Kosova do të ballafaqohet me Jordaninë në një ndeshje miqësore.
Në prag të kësaj sfide, grupi i tifozëve “Dardanët” kanë bërë thirrje që stadiumi të mbushet me tifozë për ta përkrahur ekipin, edhe pse sipas tyre rezultatet pozitive janë duke munguar.
“Kosova zhvillon ndeshjen e fundit të vitit në stadiumin “Fadil Vokrri”, si nikoqire e Jordanisë. Ndeshje e karakterit miqësor, por që nuk e zbeh rëndësinë për tifozët dhe vetë kombëtaren. Me shpresën që do të shohim shkëndijat e para të rikëndelljes, iu ftojmë që ta përkrahim ekipin tonë kombëtar sa më masivisht, përkundër rezultateve dhe frymës jo-optimale”, thuhet në thirrjen e “Dardanëve” të lëshuar në Facebook.
“Askund nuk është e shkruar që kombëtarja të mbështetet vetëm në faza ekzaltuese të fitoreve. Përkundrazi, tani më shumë se kurrë duhet t’u qëndrojmë pranë. Edhe në ndeshje miqësore, si kjo e ditës së mërkurë, në ora 18:00, ndaj Jordanisë. Besa, besë – Kosovë!”, thuhet në fund të thirrjes së “Dardanëve”.