Kosova është bërë së fundi qendër e vizitave të rëndësishme nga njerëzit kryesorë të sportit.
Tri ditë më parë për vizitë zyrtare në Kosovë qëndroi presidenti i FIFA-s, Gianni Infantino, ndërsa sot në vendin tonë po qëndron shefi i futbollit në UEFA, Zvonimir Boban.
Kosova do të ketë një vizitë tejet të rëndësishme edhe ditën e nesërme, por kësaj here radha e sportit të basketbollit.
Sekretari Gjeneral i FIBA Botës apo numri një i basketbollit në botë, Andreas Zagklis do të vizitojë Kosovën më 6-7 tetor. Ai do të jetë i pranishëm në finalen e Superkupës Mbarëkombëtare, më 6 tetor në Mitrovicë (nga ora 20:00), si dhe do të takohet me krerët e Federatës së Basketbollit të Kosovës (FBK).
Të enjten (6 tetor) do të takohet me krerët e Komitetit Olimpik të Kosovës (KOK) nga ora 14:30 në hotelin “Sheraton”.
Sekretari Gjeneral i FIBA Botës gjithashtu do të takohet me kryetarin e Prishtinës, Përparim Rama (7 tetor nga ora 10:00 në Komunën e Prishtinës) dhe me Ministrin e Kulturës, Rinisë dhe Sportit të Kosovës, Hajrulla Çeku (7 tetor nga ora 11:00 në MKRS).
Zagklis është një mbështetës i madh i basketbollit të Kosovës, duke përkrahur projekte të ndryshme, si dhe FBK-në, ku në shumë raste e ka lavdëruar punën që bën Federata.
Kjo është vizita e parë e Sekretarit Gjeneral të FIBA Botës në Kosovë, duke treguar mbështetjen e madhe për basketbollin e Kosovës.