Një delegacion nga Agjencia Ndërkombëtare e Energjisë Atomike mund të vizitojë termocentralin bërthamor të Zaporizhzhia-s në fillim të muajit të ardhshëm, ka thënë një zyrtar rus.
Ky mund të konsiderohet si sinjali i fundit pozitiv, pasi Ukraina tha se ka diskutuar me Organizatën e Kombeve të Bashkuara rreth një vizite në këtë central.
Mikhail Ulyanov, përfaqësuesi rus në Vjenë, ku është e vendosur Agjencia Ndërkombëtare e Energjisë Atomike tha: “Është shumë herët për të thënë diçka për detajet, të gjitha këto janë çështje jashtëzakonisht të ndjeshme, ne po diskutojmë dhe do të vazhdojmë të diskutojmë modalitetet e misionit, rrugën, numrin e personave që do të përfshihen në këtë, sa kohë do të qëndrojnë në stacion dhe për çfarë detyrash janë dërguar atje. Kur mund të ndodhë kjo — parashikimet nuk realizohen çdoherë, por sipas asaj që besoj unë, mund të flasim realisht për ditët e para të shtatorit, përveç nëse shfaqen përsëri disa faktorë të jashtëm që nuk lidhen me qëllimet“.
Sipas tij, ende po diskutohet rreth detajeve./UBTNews/