Agjencia kryesore e inteligjencës e Zvicrës, Shërbimi Federal i Inteligjencës (FIS), thotë se si pasojë e pushtimit të Ukrainës nga Moska, vendi është bërë pikë e nxehtë spiunazhi. Të paktën 220 zyrtarë që Rusia ka akredituar në vend janë të dyshuar si spiunë.
Për shkak se spiunimi rus është dobësuar në Evropë dhe Amerikë të Veriut, agjentët rusë po operojnë në Bern, kryeqytetin zviceran, dhe në misionin e Moskës në Kombet e Bashkuara në Gjenevë, tha FIS në raportin e saj vjetor.
“Në Evropë, Zvicra është një nga shtetet me numrin më të lartë të oficerëve të inteligjencës ruse që operojnë nën mbulimin diplomatik, pjesërisht për shkak të rolit të saj si mikpritëse e organizatave ndërkombëtare”, thuhet në raportin e publikuar të hënën.
OKB-ja ka selinë e saj evropiane në Gjenevë si dhe qyteti ka disa agjenci të OKB-së dhe organizata tjera ndërkombëtare./UBTNews/