Një familje franceze e kapluar nga teoritë konspirative u hodhën njëri pas tjetrit nga apartamenti i tyre në katin e shtatë në qytetin zviceran të Montreux, tha policia të martën.
Vetëm një djalë 15-vjeçar i mbijetoi tragjedisë të enjten e kaluar. Ai ndodhet në koma në një gjendje stabile në spital.
Policia rajonale e Vaud njoftoi të martën se gjetjet e tyre “bëjnë të mundur përjashtimin e ndërhyrjes së një pale të tretë dhe sugjerojnë që të gjitha viktimat u hodhën nga ballkoni njëri pas tjetrit”.
Policia dhe prokuroria po punojnë për teorinë e “vetëvrasjes kolektive”.
Një burrë 40-vjeçar, gruaja e tij 41-vjeçare, motra e saj binjake, vajza tetë-vjeçare e çiftit dhe djali i tyre kërcyen nga apartamenti, ku të gjithë jetonin “të tërhequr nga shoqëria”, sipas policisë.
Hetuesit thanë se dy oficerë trokitën në derën e banesës në orën 6:15 të mëngjesit, duke dashur të flisnin me babanë rreth rregullimeve të shkollimit në shtëpi për djalin e tij.
Një zë pyeti se kush ishte në derë, por më pas nuk tha asgjë më tej. Në pamundësi për të hyrë, oficerët u larguan.
Pak para orës 7:00 të mëngjesit, të pesë u hodhën nga ballkoni brenda pesë minutave.
Policia nuk zbuloi asnjë gjurmë përleshjeje, duke konfirmuar se ata u hodhën me dëshirën e tyre. Në ballkon u gjet një shkallë.
“Hetimet teknike nuk tregojnë shenja paralajmëruese të një akti të tillë”, shtuan ata, duke theksuar megjithatë se “që nga fillimi i pandemisë, familja ishte shumë e interesuar për teoritë konspirative dhe mbijetuese”./UBTNews/