Një eksperte e të drejtave të Kombeve të Bashkuara tha të hënën se “zhdukja me forcë” e liderit të opozitës ruse Alexei Navalny ishte alarmante, duke kërkuar nga Moska që ta lirojë menjëherë.
Avokatët e kritikut të Kremlinit janë penguar të takohen me të që nga 6 dhjetori dhe ai nuk u paraqit në një seancë gjyqësore të planifikuar të premten e kaluar.
“Jam thellësisht e shqetësuar se autoritetet ruse nuk do të zbulojnë vendndodhjen dhe mirëqenien e Z. Navalny për një periudhë të gjatë kohore, çka përbën një zhdukje të detyruar”, tha Mariana Katzarova, raportuesja speciale e OKB-së për të drejtat e njeriut në Rusi.
Navalny u burgos për 19 vjet me akuza për ekstremizëm në vitin 2021 pasi i mbijetoi një atentati me helmim.
Katzarova tha se kishte ngritur shqetësimet e saj tek autoritetet ruse pasi ekipit të Navalny-t iu tha të premten se ai ishte larguar nga rajoni i Vladimir pranë Moskës më 11 dhjetor dhe ishte dërguar në një vend të panjohur.
Familja dhe avokatët e Navalny-t u kishin dërguar letra të gjitha kolonive penale duke u përpjekur të identifikonin vendndodhjen e tij, tha ajo.
“Ata kanë marrë informacionin fillestar se ai mund të jetë në një koloni penale të Omsk, por ky informacion u refuzua më vonë”, tha Katzarova në një deklaratë.
Një gjykatë në fillim të këtij viti vendosi që Navalny të transferohej në një burg më të ashpër./UBTNews/