Deputeti i Lidhjes Demokratike të Kosovës (LDK) Armend Zemaj në seancën e sotme të Kuvendit të Kosovës ka pyetur kryeministrin Albin Kurti nëse janë plotësuar kriteret dhe thirrjet e Lëvizjes Vetëvendosje se nuk do të ketë takim me palën serbe në Bruksel, pa kërkuar falje për krimet dhe gjenocidin në Kosovë.
Më herët është paralajmëruar se një takim i kryeministrit Albin Kurti me presidentin e Serbisë Aleksandër Vuçiq do të mbahet kah mesi i këtij muaji në Bruksel, e që do të ishte takimi i parë i tyre në procesin e dialogut.
Zemaj sot në Kuvend ka përkujtuar para deputetëve nëse janë plotësuar të gjitha kushtet për mbajtjen e këtij takimi, duke pasur parasysh se Serbia ende nuk ka kërkuar falje për krimet e kryera gjatë luftës së fundit në Kosovë.
“A janë plotësuar kriteret nga rezoluta e Kuvendit të Kosovës edhe thirrjet e LVV-së që nuk do të ketë takim pa kërkuar falje për krimet dhe gjenocidin në Kosovë, pa paguar apo marrë përgjegjësinë për dëmet e luftës dhe pa kthyer të pagjeturit. Nëse do të ketë një takim para këtyre, atëherë cila është përgjegjësia apo fjala e dhënë, kërkesat, sulmet, etiketimet në të kaluarën”, tha Zemaj.
Ndryshe, kryeministri Kurti në maj të këtij viti kishte deklaruar se procesi i dialogut do të jetë i përgatitur mirë dhe se do të përfundojë me marrëveshje për njohje reciproke, teksa ka paralajmëruar edhe padi për gjenocid ndaj Serbisë në Gjykatën Ndërkombëtare të Drejtësisë./UBTNews