Ish-ministri i Shëndetësisë, Armend Zemaj në një prononcim për Ekonomia Online deklaroi se masat e ndërmarra nga Qeveria nuk e kanë parandaluar rritjen e infeksionit.
Ndërsa për masat që ende janë në fuqi, Zemaj i quan banalitet. Ai thotë se as institucionet qeverisëse nuk e dinë se kush e ka propozuar orën policore.
“Masat e kanë humbur kuptimin në mos menaxhimin e kësaj situate. Masat që janë ndërmarrë kanë qenë konfrontim me njëra tjetrën dhe nuk e kanë parandaluar rritjen e infeksionit po as të rasteve të vdekjes. Tashmë është banalizuar ora policore thuajse është harruar që ka shtatë deri tetë muaj që nuk e dinë as ministri dhe qeveria se kush e ka propozuar”, deklaroi ministri Zemaj.
Sipas tij, duhet të ketë angazhim serioz nga qeveria dhe Ministria e Shëndetësisë që qytetarët ta marrin dozën përforcuese.
“Interesimi duhet të shtohet. Kërkesa që doza përforcuese të merret duhet të jetë një angazhim më serioz i qeverisë dhe ministrisë së shëndetësisë. Të ketë një lloj marketing pozitiv që qytetarët të mbrohen nga virusi. Nëse ka menaxhim të mirë edhe variantet e reja mund ti kontrollojmë lehtësisht duke mos e mbyllur ekonominë, duke hapur gastronominë”, tha Zemaj.