Presidenti Volodymyr Zelensky ka vizituar qytetin Kherson disa ditë pasi u çlirua.
Ai foli me ushtarët e mbledhur në qytet, duke thënë se Ukraina “po përparon” dhe është gati për paqe.
Humbja e Khersonit, e marrë në fazat e hershme të pushtimit, është një pengesë e madhe për Rusinë. Moska e kishte shpallur atë qendër administrative të rajonit Kherson të aneksuar ilegalisht dhe ishte i vetmi kryeqytet rajonal që u pushtua.
Kherson u kap në mars, dhe ishte një nga sukseset kryesore të hershme të Rusisë në luftë.
Rajoni ishte atëherë një nga katër që u aneksuan ilegalisht pas të ashtuquajtura referendumeve që u mbajtën në shtator.
Në një ceremoni në Moskë, presidenti rus Vladimir Putin tha se aneksimi i Luhansk, Donetsk, Zaporizhzhia dhe Kherson ishte “i panegociueshëm”.
Por në javët në vijim Ukraina filloi të fitonte në jug të vendit, duke përparuar përgjatë lumit Dnipro drejt Khersonit dhe duke i vënë forcat ruse nën presion.
Më në fund, forcat ruse u tërhoqën dhe trupat ukrainase hynë në qytet të premten.
Vendasit u panë duke festuar, disa të ribashkuar me të dashurit që nuk i kishin parë për muaj të tërë. Gjendja në qytet ishte e hareshme, plot gëzim dhe lehtësim, por edhe drithërimë dhe frikë nga ajo që mund të vijë më pas, raportoi Jeremy Bowen i BBC-së.
Në vizitën e tij të hënën, Zelensky u tha trupave se Ukraina është “gati për paqe, paqe për të gjithë vendin tonë”, njoftoi agjencia e lajmeve Reuters.
Ai falënderoi NATO-n dhe aleatët e tjerë për mbështetjen e tyre në luftën kundër Rusisë, duke shtuar se sistemet raketore të artilerisë me lëvizshmëri të lartë nga SHBA kishin bërë një ndryshim të madh për Kievin.
Presidenti iu drejtua një turme të mbledhur në sheshin kryesor të Khersonit, disa prej të cilëve valëvitnin flamuj ukrainas ose i mbanin të mbështjellë mbi supet e tyre, tha një gazetar i Reuters në Kherson.
Zelensky tha se ai është “me të vërtetë i lumtur” për çlirimin, ashtu si dhe populli i Ukrainës.
I pyetur se ku mund të avancojnë më pas forcat ukrainase, ai tha: “Jo në Moskë…Ne nuk jemi të interesuar për territoret e një vendi tjetër”./UBTNews/