Presidenti ukrainas, Volodymyr Zelensky, ka akuzuar forcat ruse se po planifikojnë të organizojnë “një tubim të rremë në mbështetje të Rusisë” në qytetin port strategjik të Khersonit.
Në një fjalim televiziv mëngjesin e së premtes, Zelensky pohoi se trupat ruse po kalojnë me autobusë të huaj nga Krimea e aneksuar nga Moska dhe po përpiqen të rekrutojnë tradhtarë nga vendasit për të kërkuar që Kherson të bëhet qytet rus.
“U bëj thirrje banorëve të Khersonit: Ju mund ta ndalni këtë, tregojuni se Kherson është qyteti juaj. Ne nuk do të heqim dorë nga ajo që është e jona”, tha Zelensky.
“Tregojuni atyre flamujt tanë, këndoni himnin tonë, tregoni shpirtin tuaj, bëjini të ditur se ata mund të qëndrojnë në Kherson vetëm përkohësisht dhe nuk do të jenë kurrë në gjendje të pretendojnë pronësinë e Khersonit apo të ndonjë qyteti tjetër të vendit tonë”, shtoi ai.
Forcat ruse morën kontrollin e Khersonit në Ukrainën jugore të mërkurën mbrëma. Qeveria ukrainase tha të premten se trupat ruse kanë pushtuar kullën televizive të Khersonit dhe po transmetojnë kanale ruse, duke sugjeruar se Moska mund të planifikojë të pushtojë përgjithmonë qytetin./UBTNews/