Lëvizja Vetëvendosje në Prishtinë e kanë hedhur fajin karshi qeverisjes komunale për zhvendosjen e festivalit “Sunny Hill” në Tiranë.
Asamblistët e këtij subjekti opozitar u shprehën se nuk janë kundër mbajtjes së festivalit në Prishtinës, por kundër procedurave për dhënien e pronës komunale për ‘Sunny Hill SHPK”.
Asamblisti i Lëvizjes Vetëvendosje në Prishtinë, Gëzim Sveçla u shpreh se mos kompletimi i dokumentacionit dhe tendenca për ta hedhur fajin diku tjetër e paraqet më së shumti këtë dështim.
“Vërejtjet tona janë në tri drejtime. Çështja e parë ka qenë aspekti procedural, çështja e dytë ka qenë kohëzgjatje e kontratës dhe çështja e tretë ka qenë qasje për festivalet tjera në kontratën që na është dorëzuar. Neve atë ditë është decidivisht e shprehur se festivalet tjera të karakterit të ngjashëm nuk iu lejohet mbajtja e asnjë eventi në atë parcelë… E kemi ditur se gjendja në menaxhim të komunës së Prishtinës nuk është e mirë po kjo paraqitje dëshmoi se gjendja është katastrofale u vërejt qartë se fajtorët për dështimin e festivalit “Sunny Hill” ndodhen në këtë objektin prapa. Mos kompletimi i dokumentacionit dhe tendenca për ta hedhur fajin diku tjetër e paraqet më së shumti këtë dështim”, u shpreh ai.
Sipas tij me një kërkesë drejtuar në MAPL për shfrytëzim të përkohshëm të pronës do të mundësonte që lehtësisht festivali të mbahej në Prishtinë.
“Është e padrejtë ajo që po i bëhet rinisë të kryeqytetit tonë për mënyrën se si është vendosur të bartet në Tiranë, ka mundur të ndodhë edhe në Prishtinë. Me një kërkesë drejtuar Ministrisë të Shërbimeve Publike për shfrytëzim të përkohshëm kjo gjë do të ishte rregulluar dhe festivali do të ishte mbajtur sikurse viteve të kaluara. Do t’i jepet kohë e mjaftueshme komunës që të përgatisë dokumentacionin e nevojshëm për një zgjidhje afatgjate”, theksoi ai.
Ndërsa, bashkëpartiakja e tij, Nora Kelmendi derisa ka përmendur se cila nga dokumentet kanë munduar në seancën kur ishte votuar dhënia e pronës komunale për “Sunny Hill” theksoi se kërkesa për këtë pronë ishte e vitit 2020 drejtuar ish-kryetarit të Prishtinës, Shpend Ahmeti.
Tutje ajo tha se LVV nuk është kundër këtij festivali, por kundër procedurave të zhvilluara për dhënien e pronës komunale për ‘Sunny Hill SHPK”.
“Ne si grup i Lëvizjes Vetëvendosje vetëm kemi kërkuar që dokumentacioni për dhënien në shfrytëzim të pronës së paluajtshme të jetë konform legjislacionit në fuqi dhe të ketë transparencë në tërë procesin dhe vendimet e marra… Ne asnjëherë nuk kemi qenë kundër festivalit dhe këtë e kemi thënë në seancë dhe vërejtjet tona kanë qenë vetëm sa i përket procedurave të zhvilluara në dhënien në shfrytëzim prej 99 viteve për ‘Sunny Hill SHPK”, u shpreh ajo.
E gjatë ditës së sotme konferencë për medie për çështjen e “Sunny Hill” ka mbajtur edhe kryetari i Prishtinës, Përparim Rama i cili fajin për zhvendosje të këtij festivali në Shqipëri ia ka hedhur Qeverisë së Kosovës.