Presidenti serb Aleksandar Vuçiq ka thirrur për të martën një takim urgjent të Këshillit të Sigurisë Kombëtare lidhur me situatën në kufirin e Jarinjes si temën kryesore në rendin e ditës, shkruan Tanjug, transmeton UBT News.
Takimi urgjent i Këshillit do të mbahet në orën 10 të mëngjesit.
Kujtojmë se Qeveria e Republikës së Kosovës ka marrë vendim që nga sot të vendoset reciprocitetit ndaj Serbisë sa i përket targave të automjeteve. Dokumenti është nënshkruar nga Ministri i punëve të Brendshme, Xhelal Sveçla.
Në vendim thuhet se “obligohet pajisja me targa të përkohshme për të gjitha automjetet që mbajnë targa të Serbisë dhe hyjnë në territorin e Republikës së Kosovës. Pajisja me targa të përkohshme bëhet në të gjitha pikat e kalimit kufitar të Republikës së Kosovës”.
Tutje në vendim thuhet se vlefshmëria e këtyre targave të përkohshme është 60 ditë.