Ukraina nisi një sulm të madh me dron në një bazë ajrore në rajonin e Rostovit të Rusisë, duke lënë të vdekur ushtarë rusë dhe duke shkatërruar avionë luftarakë, bën të ditur një burim ukrainas që ka njohuri në lidhje me operacionin.
Shërbimi i Sigurisë së Ukrainës dhe ushtria ukrainase thonë se janë përgjegjëse pas sulmeve në aeroportin Morozovsk në rajonin e Rostovit, të cilat shkatërruan të paktën gjashtë avionë luftarakë rusë, duke shtuar se “operacioni është i rëndësishëm për të zvogëluar potencialin ushtarak rus”.
Fusha ajrore është në shënjestër sepse përdorej si bazë për avionët “të përdorur për të lëshuar bomba ajrore të drejtuara në pozicionet e Ukrainës dhe vendbanimet kufitare”. Sipas të dhënave, përafërsisht 20 personel rus u goditën ose mbetën të vrarë ose të plagosur.
Guvernatori i Rostovit, Vasily Golubev konfirmoi një sulm prej mbi 40 dronësh në rrethin Morozovsky të rajonit, duke rezultuar në “dëme të vogla” në dëmtimin e një nënstacioni elektrik, por tha se askush nuk u lëndua.
Disa rajone në Rusi janë shënjestruar nga sulmet me UAV gjatë natës, me Ministrinë e Mbrojtjes që pretendoi të premten përgjimin dhe shkatërrimin e të paktën 53 dronëve ukrainas nëpër territore të ndryshme.
Sipas ministrisë, sistemet e mbrojtjes ajrore kapën 44 UAV mbi rajonin e Rostovit, gjashtë UAV mbi rajonin e Krasnodarit dhe nga një mbi rajonet Saratov, Kursk dhe Belgorod.
Në qytetin Engels në juglindje të Saratovit, ku gjindet një bazë strategjike e aviacionit të Forcave të Armatosura Ruse, kreu rajonal Roman Busargin konfirmoi përgjimin e një droni, por ai nuk pohoi viktima apo shkatërrime.
Sulmet në rajonin e Belgorodit pranë kufirit ukrainas vazhduan gjithashtu me guvernatorin e tij, Vyacheslav Gladkov, duke raportuar se rajoni u vu nën zjarr nga Forcat e Armatosura të Ukrainës, gjë që rezultoi në dëmtimin e linjave të furnizimit me energji elektrike dhe gaz.
Rajoni i Rostovit, i cili kufizohet me Ukrainën në jug të Rusisë, është ndikuar më parë nga sulmet ajrore strategjike të Kievit.
Rostov-on-Don u pushtua për pak kohë nga trupat Wagner gjatë rebelimit të shkurtër të grupit ushtarak privat kundër Kremlinit në fillim të këtij viti.
Ukraina po tregon gatishmëri në rritje për të nisur sulme të synuara përtej kufirit, në një përpjekje të dukshme për të ulur ngadalë mbështetjen e brendshme ruse për luftën dhe për të degraduar infrastrukturën ruse./UBTNews/