Ukraina do të rimarrë Krimenë pasi është “toka jonë”, tha presidenti ukrainas Volodymyr Zelensky teksa iu drejtua sesionit “Ukraine Breakfast” në Davos të enjten.
“Nuk është një qëllim, është toka jonë. Krimea është deti dhe malet tona. Na jepni armët tuaja dhe ne do të rifitojmë [atë që janë] tonat”, tha Zelensky kur u pyet nga paneli nëse ai synon të rimarrë Krimenë.
“Por ka ende një mundësi që Rusia të largohet nga ky territor, dhe jo vetëm ky. Askush nuk thotë se marrëdhëniet mund të rivendosen, por mund të shpëtojë jetën e njerëzve të tyre”, tha ai, përcjell UBT News.
“Hendeku midis vendeve tona është i madh. Nuk është artificial. Është gërmuar nga [Presidenti rus Vladimir] Putin. Ai qëndron me këtë lopatë dhe do të mbetet me këtë lopatë në histori”, tha Zelensky.
I pyetur për mundësinë e negociatave të paqes, Zelensky tha, “bisedimet për paqen nuk janë paqe. Palët duhet ta kuptojnë atë. Për tre vitet e fundit [që kur u bë president] ne bëmë gjithçka që mundëm për të çliruar tokën tonë përmes diplomacisë”, tha ai.
“Dikush nuk deshi, nuk pati kohë, nuk besoi, parashtroi kushte. Kishte shumë njerëz të tillë dhe qendra e gjithë kësaj ishte në Moskë”, shtoi ai.
“Unë nuk e kuptoj me kë të flas. Nuk e kuptoj fare nëse ai [Putini] është gjallë, nëse ai merr vendime, apo kush po merr vendime”, tha Zelensky. “Nuk e kuptoj fare se si mund t’u premtoni liderëve evropianë një gjë dhe të filloni një luftë të nesërmen”./UBTNews/