Parlamenti i Ukrainës ka votuar në favor të ndalimit të një pjese të muzikës ruse në media dhe hapësira publike.
Ndalimi nuk do të zbatohet për të gjithë muzikën ruse, por ka të bëjë me muzikën e krijuar ose të interpretuar nga ata që janë ose kanë qenë shtetas rusë pas vitit 1991.
Artistët që kanë dënuar luftën e Rusisë në Ukrainë mund të aplikojnë për një përjashtim nga ndalimi.
Sipas legjislacionit do të ndalohet edhe importi i librave nga Rusia dhe Bjellorusia.
Shumë nga ata që jetojnë në zonat e Ukrainës lindore dhe jugore kanë ndier historikisht një lidhje të fortë me Rusinë, shpesh duke folur rusisht si gjuhën e tyre të parë.
Por pushtimi rus i Ukrainës ka bërë që shumë ukrainas të duan të ndahen nga kultura ruse.
Projektligji, i miratuar nga deputetët të dielën, ndalon që një pjesë e muzikës ruse të luhet ose të interpretohet në televizion, radio, shkolla, transport publik, hotele, restorante, kinema dhe hapësira të tjera publike.
Projektligji siguroi mbështetje nga 303 nga 450 deputetë në parlamentin ukrainas./UBTNews/