Ministrat e Jashtëm të Grupit të Shtatë (G7), vendeve më të industrializuara, do të mblidhen në Itali për një konferencë dyditore në qytetin e Fiuggi, rreth 80 kilometra nga Roma.
Ky është takimi i fundit i planifikuar i këtij viti për ministrat e Jashtëm të G7-s. Luftërat në Lindjen e Mesme dhe Ukrainë pritet të jenë ndër temat kryesore të diskutimit, bashkë me pasojat e rizgjedhjes së Donald Trump si president i SHBA për rendin ndërkombëtar. Po ashtu, një urdhërarrest i lëshuar nga Gjykata Penale Ndërkombëtare kundër kryeministrit izraelit, Benjamin Netanyahu, për krime të dyshuara lufte në Gaza ka shkaktuar trazira.
Sa i përket luftës në Ukrainë, Rusia kohët e fundit lëshoi një raketë me rreze të mesme veprimi, e cila mund të jetë e pajisur me shpërthyes bërthamorë, ndërsa Ukraina ka lëshuar raketa amerikane ATACMS dhe raketa britanike “Storm Shadow” në objektiva ushtarake në Rusi./UBTNews/