Dy profesorë nga Vidzeme University of Applied Sciences në Letoni, Prof. Dr. Ilgvars Abols dhe Prof. Dr. Iveta Druva-Druvaskalne, vizituan UBT-në në kuadër të programit Erasmus+ për të konkretizuar marrëveshjen mes dy institucioneve dhe për të eksploruar mundësi të reja bashkëpunimi, duke përfshirë mobilitetin e studentëve dhe stafit akademik.
Gjatë vizitës, profesorët zhvilluan takime të frytshme me zyrtarët e Zyrës Ndërkombëtare të UBT-së, ku u diskutuan mundësitë për bashkëpunim akademik, projektet e përbashkëta në kuadër të capacity building dhe aplikimet për fonde të reja në kuadër të Erasmus+/KA171. Kjo përpjekje ka për qëllim të thellojë lidhjet ndërkombëtare të UBT-së dhe të ofrojë mundësi të reja zhvillimi për studentët dhe stafin akademik.
Një moment i rëndësishëm i vizitës ishte sesioni informues për studentët e UBT-së mbi mundësitë e studimeve në Letoni, të cilat mund të realizohen përmes marrëveshjes për mobilitetin e studentëve dhe stafit. Ky informacion i ofruar studentëve është një mundësi e shkëlqyer për t’u njohur me mundësitë e shkëmbimit ndërkombëtar dhe për t’u angazhuar në aktivitete akademike në nivel ndërkombëtar.
Profesorët e Vidzeme University of Applied Sciences vazhduan vizitën e tyre në UBT Dukagjini Center, si dhe eksploruan nga afër Qytetin e Mençur të UBT-së në Lipjan, ku u njohën me infrastrukturën moderne dhe mbështetjen që UBT u ofron të diplomuarve të saj.
Një aktivitet i veçantë ishte tryeza e rrumbullakët me studentët dhe stafin akademik të programit të Turizmit, ku u diskutuan praktikat më të mira në këtë fushë, si dhe teknologjitë inovative që po shndërrojnë industrinë e turizmit. Kjo ngjarje ofroi mundësinë për shkëmbim ideash dhe përmirësimin e mësimdhënies në një sektor kyç për zhvillimin ekonomik.
Pjesë e vizitës ishte gjithashtu një ekskursioni në qytetin e Pejës, ku, së bashku me Prof. Kushtrim Dreshaj, profesorët vizituan Muzeun e Qytetit, Rugovën dhe disa nga atraksionet më të njohura të turizmit malor. Gjatë qëndrimit në Pejë, ata zhvilluan gjithashtu takime me partnerët e UBT-së në sektorin e turizmit. Një nga takimet më të rëndësishme ishte ai me kryetarin e komunës së Pejës, z. Gazmend Muhaxheri, ku u diskutuan mundësitë për bashkëpunim të mëtejshëm në zhvillimin e turizmit në këtë rajon.
Vizita përfundoi me një tur të Prishtinës, ku profesorët u njohën me kryeqytetin dhe mundësitë që ofron ky qytet për zhvillimin e edukimit dhe bashkëpunimin ndërkombëtar. Kjo vizitë shënon një hap të rëndësishëm për UBT-në, duke e fuqizuar më tej partneritetin e saj me institucione të njohura ndërkombëtare dhe duke krijuar mundësi të reja për studentët dhe stafin akademik të saj./UBTNews/
