Më 17 janar, në Parkun Shkencor, Inovativ, Teknologjik të UBT-së, do të zhvillohet Festivali i Fotografisë Digjitale i titulluar “Beyond the Lens: Stories Untold”. Ky është një eveniment i jashtëzakonshëm i organizuar nga Fakulteti i Arteve dhe Mediave Digjitale i UBT-së, i cili do të shfaqë fotografinë si një mjet të fuqishëm për tregimin e historive të pathëna dhe zërave të margjinalizuar.
Festivali do të përqendrohet në tema bashkëkohore si identiteti, kujtesa dhe sfidat mjedisore. Në ekspozitën e tij do të jenë të pranishëm 50 studentë të cilët do të prezantojnë punimet e tyre përmes një ekspozite të pasur me kreativitet dhe teknologji të avancuar. Të rinjtë do të kenë mundësinë të eksperimentojnë me koncepte të ndryshme, duke përdorur teknologjitë më të fundit të disponueshme në laboratorët e UBT-së.
Festivali synon të nxjerrë në pah rolin e kamerës si një dëshmitare e kohës sonë dhe një mjet i fuqishëm për zhvillimin e industrive kreative. Ky aktivitet do të shërbejë për ndarjen e narrativave të pazbuluara, duke kontribuar gjithashtu në ndërgjegjësimin për çështje që prekin shoqërinë dhe mjedisin.
Hyrja në këtë ngjarje është falas dhe të gjithë të interesuarit janë të ftuar të bashkohen me ne më 17 janar, në orën 17:00, për të përjetuar fuqinë e fotografisë si një formë shprehjeje dhe transformimi./UBTNews/