Twitter ka qenë në qendër të vëmendjes për shumë kohë tani, falë blerjes dramatike nga njeriu më i pasur në botë, Elon Musk.
Platforma e mediave sociale ka ndërmarrë një sërë hapash për të modifikuar veten që kur Musk mori drejtimin, dhe lansimi i fundit është vendosur të jetë distinktivi “Official”, i cili do t’u jepet vetëm llogarive të zgjedhura.
Njoftimi u bë nga Esther Crawford, e cila shpjegoi se si do të funksionojë distinktivi i ri: “Jo të gjitha llogaritë e verifikuara më parë do të marrin etiketën “Official” dhe etiketa nuk është e disponueshme për blerje. Llogaritë që do ta marrin përfshijnë llogari qeveritare, kompani tregtare, partnerë biznesi, media kryesore, botues dhe disa figura publike”.
Sipas Crawford, “shumë njerëz kanë pyetur se si do të jeni në gjendje të bëni dallimin midis abonentëve @TwitterBlue me shenja blu dhe llogarive që janë verifikuar si zyrtare”.
Crawford ka ndarë gjithashtu një shabllon rreth asaj se si mund të duket distinktivi “Official” në një llogari pasi funksioni të jetë lansuar.
Shabllonin mund ta shihni poshtë:
Crawford tha se përdoruesit e Twitter Blue nuk do të marrin distinktivin “Official” pasi “Twitter Blue i ri nuk përfshin verifikimin e ID-së – është një abonim zgjedhës, me pagesë që ofron një shenjë blu dhe akses në veçori të zgjedhura. Ne do të vazhdojmë të eksperimentojmë me mënyra për të dalluar llojet e llogarive”.
Plani i Elon Musk për të tarifuar 8 dollarë në muaj për Twitter Blue ka hasur në reagime të ndryshme nga personazhe publike dhe përdorues të rregullt. Një numër përdoruesish, përfshirë komedianin Kathy Griffin, zgjodhën të tallnin Musk duke ndryshuar emrat dhe fotot e tyre të profilit në platformë me ato të miliarderit. Kjo, nga ana tjetër, rezultoi në pezullimin e disa llogarive./UBTNews/