Presidenti Donald Trump njoftoi të premten se gjatë një takimi me CEO-n e Intel-it, Lip-Bu Tan, në Shtëpinë e Bardhë, kishte kërkuar që SHBA të siguronte një pjesë aksionesh në kompaninë e teknologjisë. Sipas Trump, u ra dakord për një pjesëmarrje prej 10% dhe kjo do të përkthehej në rreth 10 miliardë dollarë për ekonominë amerikane.
Nga ana e saj, Intel konfirmoi përmes një deklarate zyrtare se qeveria amerikane do të investojë 8.9 miliardë dollarë në aksione të kompanisë. Investimi është pjesë e një strategjie më të gjerë për të forcuar prodhimin e brendshëm të çipave në SHBA, dhe përfaqëson besimin e administratës në rolin e Intel në këtë industri.
Financimi përfshin 5.7 miliardë dollarë në formën e granteve nga ligji CHIPS and Science Act, si dhe 2.2 miliardë dollarë që kompania kishte marrë më herët. Me përfshirjen edhe të 3.2 miliardë dollarëve shtesë nga programi i Departamentit të Mbrojtjes “Secure Enclave”, totali i investimit arrin në 11.1 miliardë dollarë.
Qeveria federale do të blejë 433.3 milionë aksione të Intel me një çmim prej 20.47 dollarësh për aksion, duke u bërë pronare e 9.9% të kompanisë. Sipas marrëveshjes, qeveria nuk do të ketë përfaqësues në bordin drejtues dhe do të votojë në përputhje me shumicën e aksionarëve, përveç në raste të jashtëzakonshme.
