Dhjetra kisha, vende historike dhe muze janë dëmtuar nga lufta në Ukrainë, tha të premten agjencia kulturore e OKB-së, duke shtuar se është veçanërisht e shqetësuar për qytetin verior të Chernihiv.
UNESCO tha muajin e kaluar se ka forcuar masat mbrojtëse për trashëgiminë kulturore të rrezikuar të Ukrainës në dritën e pushtimit të Rusisë, si përdorimi i një embleme “Mburoja Blu” për të shënuar vendet e saj kulturore dhe monumentet.
“Ne jemi shumë të shqetësuar për situatën si në nivelin humanitar ashtu edhe në atë të trashëgimisë (kulturore). Trashëgimia e njerëzimit është në rrezik (në Ukrainë)”, tha në një konferencë për shtyp Ernesto Ottone, ndihmësdrejtori i përgjithshëm i UNESCO-s për kulturën.
Sipas tij, në listën e parë të UNESCO-s për vendet e dëmtuara plotësisht ose pjesërisht përfshihen 29 objekte fetare, 16 ndërtesa historike, katër muze dhe katër monumente.
Shefi i UNESCO-s, Audrey Azoulay, i shkroi ministrit të Jashtëm rus Sergei Lavrov në fillim të marsit për t’ia kujtuar atij se Rusia është nënshkruese e konventës për mbrojtjen e trashëgimisë kulturore në kohë lufte./UBTNews/