Një zjarr i rëndë ka shpërthyer mbrëmjen e së enjtes në një shtëpi familjare në vendbanimin rom të Kuršanec, afër Çakovecit në Kroaci, duke shkaktuar vdekjen tragjike të tre fëmijëve. Ngjarja ndodhi rreth orës 22:30, kur flakët përfshinë papafingon e shtëpisë.
Sipas autoriteteve, një burrë 29-vjeçar dhe një grua 25-vjeçare, e cila mbante në krahë një fëmijë, arritën të shpëtonin nga shtëpia me lëndime të lehta. Ata u transportuan në Spitalin e Qarkut Çakovec, ku u konfirmua se ndodheshin jashtë rrezikut për jetën.
Sapo u raportua rasti në orën 22:52, ekipet e zjarrfikësve, policia dhe shërbimet emergjente u dërguan në vendngjarje. Pas shuarjes së zjarrit, zjarrfikësit gjetën trupat e tre fëmijëve në pjesën e djegur të shtëpisë.
Aktualisht, vendi i ngjarjes po mbahet nën mbikëqyrjen e policisë, ndërsa hetimet janë në vijim. Prokurori i shtetit ka urdhëruar një hetim të plotë për të përcaktuar shkaqet e kësaj tragjedie./UBTNews/