Një test ekstra gjaku për pacientët që dyshohen për sulm në zemër mund të përcaktojë nëse ata janë në rrezik të lartë për të vdekur në tre vitet e ardhshme, thonë studiuesit.
Testi për proteinën C-reaktive (CRP), ndihmon në zbulimin e inflamacionit dhe përdoret tashmë në spitale për të diagnostikuar kushte të tjera. Mund të ndihmojë mjekët të vendosin se cilët pacientë mund të kenë nevojë për trajtim më agresiv dhe monitorim më të afërt, kjo mund të ndihmojë në shpëtimin e jetëve.
Shkencëtarët në Institutin Kombëtar të Zemrës dhe Mushkërive dhe Institutin Kombëtar për Kërkimin Shëndetësor në “Health Informatics Collaborative” zbuluan se testet CRP dhanë një pamje më të detajuar. Ata përdorën të dhëna nga më shumë se 250,000 pacientë të shtruar në spital me një sulm të dyshuar në zemër.
Studiuesit tani shpresojnë të testojnë ilaçin anti-inflamator colchicine – i gjetur të jetë efektiv kundër aterosklerozës, një grumbullim i depozitave yndyrore në arterie që rrit mundësinë e një ataku në zemër – te pacientët me nivele të larta CRP.
Profesor James Leiper, e quan testin një “mjet të ri të vlefshëm”.
“Çdo pesë minuta, dikush pranohet në një spital në Mbretërinë e Bashkuar me një atak në zemër dhe vlerësohet se ka 1.4 milionë njerëz në MB që i kanë mbijetuar një ataku kardiak. Duke identifikuar më mirë se cilët njerëz janë më të rrezikuar, ky test i thjeshtë gjaku mund të ndihmojë në drejtimin e trajtimeve anti-inflamatore tek ata që kanë më shumë nevojë për të”, tha ai./UBTNews/