Të paktën një person ka vdekur pas një tërmeti të fuqishëm me magnitudë 7.5 që goditi Filipinet, duke shkaktuar panik dhe dëme në ndërtesa. Pamjet tregojnë kabllot elektrike që lëvizin ndërsa automjetet ndalojnë menjëherë. Në Davao City, afër epiqendrës, pacientët u trajtuan jashtë spitalit, ndërsa korridoret u mbushën me njerëz.
Sipas BBC-së, banorët e zonave bregdetare u evakuuan për shkak të valëve mbi një metër. Tërmeti shkaktoi gjithashtu ndërprerje energjie dhe pezullim mësimi. Kjo dridhje vjen vetëm një javë pas një tërmeti 6.9 në provincën Cebu, që la 74 viktima dhe qindra të lënduar.
Guvernatori i Davao Oriental, Edwin Jubahib, raportoi se disa ndërtesa u dëmtuan dhe përshkroi dridhjet si të forta. Richie Diuyen, punonjëse e agjencisë lokale të fatkeqësive, tha se disa studentë humbën ndjenjat dhe ajo ndjeu marramendje.
Autoritetet paralajmëruan për cunami shkatërrues, por kërcënimi u hoq pas një ore. Pasgoditjet vazhduan me magnitudë 2.6–4.9. Në Indonezi u regjistruan cunami të vogla, deri në 17 cm.
Filipinet, pjesë e “Unazës së Zjarrit”, përballen me fatkeqësi natyrore të shumta, përfshirë tajfune dhe vullkane. Dr. Teresito Bacolcol nga agjencia vullkanike Phivolcs bëri thirrje qytetarëve të jenë të përgatitur dhe të mos panikojnë./D.B/KP