Rusia ka marrë kontrollin e Lysychansk, qyteti i fundit në rajonin Luhansk të Ukrainës lindore që ishte ende nën kontrollin e Ukrainës. Ushtria e Ukrainës njoftoi të dielën se ishte “detyruar të tërhiqej” nga qyteti.
Këtu janë zhvillimet kryesore të ditës së sotme:
- Rusia po përgatitet për sulm në rajonin e Donetskut, sipas Ukrainës. Shtabi i Përgjithshëm tha se pas marrjes së Lysychansk, forcat ruse po përgatiten të vazhdojnë lëvizjen e tyre drejt qyteteve në Donetsk që ende kontrollohen nga Kievi. Fokusi tani zhvendoset në qytetet Sloviansk dhe Kramatorsk, dy qendrat më të mëdha të popullsisë në zonë.
- Një shkollë e mesme në qytetin e dytë më të madh të Ukrainës, Kharkiv, u shkatërrua pasi u godit nga një raketë ruse rreth orës 4 të mëngjesit, tha kreu i administratës rajonale, Oleh Synehubov në një postim në Telegram. Nuk pati të lënduar në shkollë, por sulmet në zona të tjera të rajonit lanë të paktën tre të vdekur dhe gjashtë të plagosur në fshatin Bezruky, shtoi Synehubov.
- Portieri rus Ivan Fedotov u arrestua në Shën Petersburg me kërkesë të prokurorisë ushtarake të premten për shmangie të shërbimit ushtarak, sipas raportimeve nga mediat ruse. Sipas gazetës ruse Fontanka, zyra e prokurorit beson se ka arsye për të “konsideruar Fedotov një shmangës të ushtrisë”.
- Moska thotë se sulmi i supozuar me raketë i kryer nga forcat ukrainase në qytetin e Belgorodit kishte për qëllim të provokonte Rusinë, sipas zëdhënëses së Ministrisë së Jashtme të vendit, Maria Zakharova. Ministria akuzoi Ukrainën për shënjestrimin e qytetit të Belgorodit me tre raketa Tochka-U dhe për përdorimin e dronëve të ngarkuar me eksploziv për të goditur qytetin rus të Kursk të dielën. Ukraina nuk i ka pranuar sulmet.
- Ukraina ka kërkuar që autoritetet turke të ndalojnë një anije me flamur rus që transportonte grurë ukrainas, tha të shtunën për CNN ambasadori i vendit në Turqi, Vasyl Bodnar. Anija Zhibek Zholy është aktualisht e ankoruar pranë portit turk të Karasu pasi “në fakt u ndalua nga autoritetet doganore turke dhe nuk lejohet të hyjë në port”, tha Bondar.
- Forcat e armatosura të Ukrainës kanë ngritur flamurin e vendit mbi ishullin e gjarpërinjve, pasi detyruan një tërheqje ruse nga territori i rëndësishëm strategjik, tha një zëdhënëse e Komandës Jugore të ushtrisë, kapitenja Natalia Humeniuk në një konferencë të hënën./UBTNews/