Të korrat e vitit të ardhshëm në Ukrainë mund të shkurtohen deri në 40% për shkak të pushtimit të vazhdueshëm rus, tha zëvendësministri i Politikës Agrare dhe Ushqimit të Ukrainës, Taras Vysotskyi.
“Kemi humbur 25% të sipërfaqes së punueshme. Për sa i përket vëllimeve, natyrisht, është më shumë. Ne parashikojmë që të korrat të jenë rreth 35% më pak se vitet e mëparshme, që do të thotë rreth 30 milionë tonë më pak, 35-40% më pak, pothuajse gjysma e të korrave të vitit të kaluar”, tha Vysotskyi.
Zëvendësministri tha poashtu se rreth 500,000 tonë metrikë grurë janë vjedhur nga Rusia në territoret e kontrolluara nga forcat ruse.
Të mërkurën, ministri i jashtëm rus, Sergej Lavrov tha se çështjet në lidhje me eksportet e grurit nga Ukraina mund të zgjidhen, por se Ukraina duhet të çminojë ujërat për të siguruar kalimin e sigurt të anijeve.
Vysotskyi tha se komentet e Lavrov nuk janë të vërteta.
“Është e pavërtetë. Problemi janë anijet ushtarake ruse, nuk është cështje e Ukrainës. Deri më tani, ata nuk lejojnë që me të vërtetë të mbajnë të sigurta anijet civile të levizin brenda dhe jashtë porteve të Ukrainës”, tha ai.
Minat mund të pastrohen shpejt, por që kjo të ndodhë, lufta duhet të përfundojë ose duhet të ketë një formë të armëpushimit, shtoi ai.
“Pra, çështja është shumë e qartë, Rusia duhet të ndalojë luftën”, tha ai.
Ukraina ka akuzuar gjithashtu rusët për vendosjen e minave në Detin e Zi./UBTNews/