Talibanët kanë urdhëruar prezantueset e televizioneve afgane të mbulojnë fytyrën gjatë transmetimit. Mediat u njoftuan për dekretin të mërkurën, tha një zëdhënës për BBC Pashto.
Vendimi erdhi dy javë pasi gratë u urdhëruan të mbajnë mbulesa në publik ose në të kundërtën do të dënohen.
Kufizimet për gratë afgane po ashpërsohen – atyre u ndalohet të udhëtojnë pa të afërm meshkuj dhe shkollat e mesme janë mbyllur për vajzat. Dekreti i ri po kritikohet gjerësisht në Twitter, me disa prej tyre që e cilësuan atë si një hap tjetër nga talibanët për të promovuar ekstremizmin.
“Bota vendos maska për t’i mbrojtur njerëzit nga COVID-19. Talibanët vendosin maska për të mbrojtur njerëzit që të mos shohin fytyrat e grave gazetare. Për talibanët, gratë janë sëmundje”, shkroi një aktivist në Twitter.
Kanali privat i lajmeve Shamshad postoi një foto të prezantueses së tyre të lajmeve, duke mbajtur maskë. Fotografitë e tilla po shpërndahen në rrjete sociale.
Pasi e morën pushtetin vitin e kaluar, talibanët nxorën ligje të reja mbi atë se çfarë duhet të veshin gratë – deri në këtë muaj. Por në fillim të majit u dha vendimi që gratë ta mbulojnë fytyrën në publik. Kushdo që refuzon të pajtohet me vendimin, rrezikon një seri të përshkallëzuar dënimesh. Ky dekret vlen edhe për gratë në ekran./UBTNews/