Organizata e Kombeve të Bashkuara njoftoi se përmes një urdhri talibanët ua kanë ndaluar grave afgane punën në këtë trup.
Nga OKB-ja thonë se ndonëse nuk kishte komunikatë të shkruar, ata u informuan verbalisht. Nga OKB i kanë thënë stafit të saj afgan, burra dhe gra, që të mos paraqiten në punë për 48 orë, derisa të ketë qartësi për këtë çështje pas takimeve me talibanët.
Qëkur talibanët morën pushtetin në vitin 2021, janë shtrënguar liritë e grave afgane. Në OKB thonë se kjo është e papranueshme dhe sinqerisht e paimagjinueshme.
Punëtoret femra luajnë një rol jetik në operacionet e ndihmës në terren, veçanërisht në identifikimin e grave të tjera në nevojë. OKB-ja ka dërguar ndihma humanitare për 23 milionë njerëz në Afganistan, vend ky që po vuan nga një krizë e rëndë ekonomike dhe humanitare./UBTNews/